वैयक्तिक खर्चासाठी, व्यवसायासाठी किंवा घर खरेदीसाठी कर्ज घेणं ही सामान्य बाब आहे. कर्ज घेताना व्यक्तीकडे अनेक पर्याय असतात. कर्ज घेतल्यानंतर आर्थिक आरोग्यावर काय परिणाम होईल याची कल्पना अनेकांना नसते. त्यामुळे कोणते कर्ज योग्य आहे ? याची महिती नसल्यानं कर्ज घेताना चुका होतात. कर्ज किती प्रकारची असतात ? कोणते कर्ज केव्हा उपयोगी आहे ?तसेच कर्जाचे फायदे तोटे कोणते आहेत ? हे समजून घेऊया.
साधारणपणे कर्ज दोन प्रकारची असतात.पहिले सुरक्षित कर्ज आणि दुसरे असुरक्षित कर्ज. सुरक्षित कर्ज घेताना कोणतीही मालमत्ता उदाहरणार्थ वाहन, मुदत ठेव, शेअर्स, म्युच्युअल फंडासारख्या मालमत्ता तारण म्हणून बँकेला द्यावी लागतात. गृहकर्ज, कार कर्ज, गोल्ड लोन , मालमत्तेवरील कर्ज, शेअर्स किंवा म्युच्युअल फंड हे सुरक्षित कर्ज आहेत.
मालमत्ता गहाण ठेवल्यामुळे बँकेची जोखीम कमी होते. त्यामुळे सुरक्षित कर्जावरील व्याज दर असुरक्षित कर्जापेक्षा कमी असतात. उदाहरणार्थ, SBI गृहकर्जाचे व्याज दर 9.15 टक्क्यांपासून सुरू होतात. तर वैयक्तिक कर्जाचा व्याज दर हा 11.05 टक्क्यांपासून सुरू होतो. सुरक्षित कर्जामध्ये तुम्हाला मोठी रक्कम कर्जाऊ घेता येते. गहाण मालमत्तेच्या मूल्यानुसार कर्जाची रक्कम अवलंबून असते. घर खरेदी किंवा व्यवसाय सुरू करताना सुरक्षित कर्ज घेणं हा एक चांगला पर्याय आहे.
10 , 20 किंवा 30 वर्षांच्या कालावधीपर्यंत सुरक्षित कर्जाची परतफेड करता येते. दीर्घ कालावधीचे कर्ज असल्यानं कर्जदारावर EMI चा भार कमी होतो. मालमत्ता गहाण ठेवल्यामुळे या बँका कर्ज मंजूर करताना आडकाठी भूमिका घेत नाहीत. तसेच कर्ज देताना क्रेडिट स्कोअरही बघत नाहीत. मालमत्ता गहाण ठेऊन कर्ज देण्यात येत असल्यानं कर्जाची परतफेड न केल्यास जप्त मालमत्तांची विक्री करून कर्जाची वसुली करण्यात येते.
त्याच वेळी असुरक्षित कर्जामध्ये तुम्हाला कोणत्याही प्रकारची मालमत्ता गहाण ठेवण्याची गरज पडत नाही. असुरक्षित कर्ज कर्जदाराच्या आर्थिक इतिहास आणि कर्जाची परतफेड करण्याच्या ट्रॅक रेकॉर्डच्या आधारावर मंजूर केली जातात. वैयक्तिक कर्ज, क्रेडिट कार्ड आणि शैक्षणिक कर्जे ही असुरक्षित कर्ज आहेत. असुरक्षित कर्जाचे फायदे आणि तोटे दोन्ही आहेत.
असुरक्षित कर्जामध्ये मालमत्ता गहाण ठेवण्याची गरज नसते. त्यामुळे कर्ज थकवल्यास मौल्यवान मालमत्ता गमावण्याची भीती नसते.असुरक्षित कर्जावरील जोखीम कमी करण्यासाठी बँका जास्त व्याज आकारतात. साधारणपणे असुरक्षित कर्जामध्ये कर्जाऊ रक्कम कमी असते.
तुमची आर्थिक स्थिती आणि गरजेनुसार सुरक्षित किंवा असुरक्षित कर्ज घ्या. घर खरेदी किंवा व्यवसाय सुरू करण्यासाठी तुम्हाला मोठी रक्कम गरज असल्यानं दीर्घकालीन गुंतवणूक म्हणून सुरक्षित कर्ज घेणं हा एक चांगला पर्याय आहे. तर दुसरीकडे काही काळासाठी कमी रकमेचे कर्ज हवं असल्यास असुरक्षित कर्ज घ्या.
दोन्ही प्रकारची कर्ज मंजूर करण्यापूर्वी बँक तुमचा क्रेडिट स्कोअर, उत्पन्न, कायमस्वरूपी नोकरी, कर्ज परतफेडीची क्षमता पाहतात. कर्ज मंजूरी आणि व्याज दर ठरवताना क्रेडिट स्कोअर महत्वाची भूमिका बजावतात. क्रेडिट स्कोअर चांगला असल्यास असुरक्षित कर्ज घेताना विविध पर्याय उपलब्ध असतात. क्रेडिट स्कोअर कमी असल्यास सुरक्षित कर्ज घ्या.
पर्सनल फायनान्सबद्दल अद्ययावत माहिती मिळवण्यासाठी डाऊनलोड करा Money9 App